Gwasanaeth Cyfieithu Cymraeg a Saesneg
Gwasanaeth Cyfieithu Cymraeg a Saesneg
Mae cwmni cyfieithu Cymen wedi bod yn darparu gwasanaethau o’r safon uchaf ers dros 30 mlynedd ac rydyn ni’n un o gwmnïau cyfieithu mwyaf blaengar Cymru. Rydyn ni wedi ennill ein henw da oherwydd ansawdd a phrydlondeb ein gwaith. Mae gennym ni dîm ymroddedig o gyfieithwyr sydd ar dân eisiau gweld y Gymraeg yn cael ei defnyddio mewn bywyd bob dydd yng Nghymru.
Os hoffech chi ymuno â’r tîm, cysylltwch â ni.
Rydyn ni’n aelodau brwd o Gymdeithas Cyfieithwyr Cymru yn ogystal â Chymdeithas y Cwmnïau Cyfieithu (ATC).
Mae Cymen yn gwmni blaenllaw yn y gymuned ac yn noddi llawer o ddigwyddiadau lleol a chenedlaethol, yn ogystal â chynnal gweithgareddau i godi arian at elusennau.
Rydyn ni’n ymfalchïo yn ein proses o recriwtio a hyfforddi staff ac rydym yn meithrin ac yn hyfforddi cyfieithwyr newydd, yn ogystal â sicrhau datblygiad proffesiynol parhaus ein cyfieithwyr profiadol. Mae gennym ni hefyd dîm o weithwyr llawrydd ledled Cymru sy’n cyfieithu testun ac yn cyfieithu ar y pryd.
Rydyn ni’n cynnig gwasanaethau cyfieithu testun a chyfieithu ar y pryd i bawb – o elusennau lleol i gorfforaethau mawr.
Cyfieithu Testun
Mae gennym ni dîm o gyfieithwyr dawnus sy’n sicrhau ein bod yn darparu cyfieithiadau o’r radd flaenaf, ac rydyn ni’n buddsoddi’n gyson yn y meddalwedd diweddaraf i hwyluso’r broses gyfieithu. Rydyn ni’n gwneud pob ymdrech i sicrhau cysondeb o ran arddull a thermau, yn unol â gofynion ein cleientiaid.
Cyfieithu ar y Pryd
Gallwn ddarparu gwasanaethau cyfieithu ar y pryd ym mhob cwr o Gymru a thu hwnt ac mae gennym offer i ymdopi â chynadleddau mawr, yn ogystal â chyfieithwyr ar y pryd profiadol a chymwys sy’n sicrhau bod cyfarfodydd dwyieithog yn gallu digwydd yn rhwydd. Mae gan Cymen y sgiliau ieithyddol a thechnegol i ddiwallu eich holl anghenion cyfieithu ar y pryd – siop un stop ar gyfer eich digwyddiad dwyieithog!
Mae gennym y setiau offer cyfieithu digidol diweddaraf gyda dros 700 o glustffonau di-wifr er mwyn teilwra ein gwasanaeth cyfieithu ar gyfer pob math o ddigwyddiadau cyhoeddus, cyfarfodydd ymgynghori, cynadleddau, cyfweliadau a chyfarfodydd bwrdd. Gallwn ddarparu gwasanaeth CAP ar-lein hefyd a rhoi cyngor ar gynnal cyfarfodydd dwyieithog ar wahanol blatfformau.
Mae gennym rwydwaith o gyfieithwyr ar y pryd medrus ym mhob cwr o Gymru at eich gwasanaeth, o Gaerdydd i Gaergybi. Y clod mwyaf y gellir ei roi i'r tîm hwn o gyfieithwyr profiadol yw bod pobl yn anghofio bod cyfieithwyr ar y pryd mewn cyfarfod – y nod yw sicrhau bod y di-Gymraeg mewn cyfarfodydd dwyieithog yn clywed popeth yr un pryd â'r siaradwyr Cymraeg. Cyfieithu ar y pryd yng ngwir ystyr y gair!
Mae ein cyfieithwyr ar y pryd yn aelodau o Gymdeithas Cyfieithwyr Cymru sy’n golygu eu bod wedi llwyddo mewn prawf cyfieithu dan amodau arholiad llym. Rydym hefyd wedi ein cynnwys ar restr cyfieithwyr cymeradwy Gwasanaeth Llysoedd Ei Fawrhydi, Cynulliad Cenedlaethol Cymru a Chomisiynydd y Gymraeg, ac rydyn ni’n falch o ddweud mai ni yw cwmni cyfieithu swyddogol yr Eisteddfod Genedlaethol ers nifer o flynyddoedd bellach.
Gall ein tîm o gyfieithwyr profiadol ddelio â swmp mawr o waith cyfieithu drwy gydol y flwyddyn ac rydym bob amser ar gael yn ystod oriau swyddfa. Byddwn yn trafod amserlenni â chwsmeriaid ac wnawn ni ddim addo dim byd na allwn ei gyflawni.
Os oes gennych chi unrhyw anghenion cyfieithu neu os hoffech chi gael cyngor ar faterion ieithyddol, mae croeso cynnes i chi gysylltu â ni.
Ymunodd Aled â Cymen fel cyfieithydd ym 1999 ac mae wedi bod yn gyfarwyddwr ers 2007. Aled sy’n rheoli ac yn trefnu’r gwasanaethau cyfieithu ar y pryd ac mae’n teithio Cymru benbaladr yn darparu’r gwasanaethau hyn. Ef sydd hefyd yn ysgwyddo cyfrifoldeb dros Gysylltiadau â Chwsmeriaid a Datblygu Busnes, ac mae ganddo Dystysgrif Astudiaethau Cyfieithu a Thechnoleg o Brifysgol Bangor.
Mae Manon wedi bod yn gyfieithydd gyda Cymen ers 1999 ac yn gyfarwyddwr ar y cwmni ers 2007. Hi sy’n gyfrifol am Reoli Ansawdd yn y cwmni ac mae hi wedi cwblhau cyrsiau rheoli ac arweinyddiaeth. Mae ganddi brofiad helaeth yn rheoli prosiectau ac yn defnyddio amrywiaeth o feddalwedd cyfieithu. Mae hi’n aelod cyflawn o Gymdeithas Cyfieithwyr Cymru yn cyfieithu o’r Gymraeg i’r Saesneg ac o’r Saesneg i’r Gymraeg, yn ogystal â chyfieithu ar y pryd, a hi yw Cadeirydd y Gymdeithas ar hyn o bryd.
Luned yw prif bwynt cyswllt y cwmni. Mae’n ymateb i unrhyw ymholiadau yn syth gan ddarparu amcan bris a chytuno ar ddyddiad ac amser dychwelyd y gwaith gorffenedig. Luned sydd hefyd yn dyrannu’r gwaith i’r cyfieithydd mwyaf priodol er mwyn sicrhau bod gwaith yn cael ei gyflawni ar amser a bod y cleientiaid yn fodlon â’r gwasanaeth.
Mae Sian yn aelod newydd o dîm gweinyddol Cymen. Mae’n cynorthwyo â’r gwaith o ddelio â chwsmeriaid a derbyn gwaith gan gleientiaid, yn ogystal â rheoli’r llif gwaith yn y swyddfa. Bydd hefyd yn cyfrannu at y broses o fireinio systemau’r cwmni er mwyn gwella effeithlonrwydd.
Mae Anwen yn cyfathrebu â chwsmeriaid ac yn derbyn gwaith drwy flwch derbyn y cwmni. Hi sy’n gyfrifol am drefnu prosiectau a rhannu gwaith i gyfieithwyr sy’n gweithio yn y swyddfa a gartref.
Mae gan Ifan dros 12 mlynedd o brofiad o weithio ym maes cyllid. Mae ganddo gymhwyster Lefel 4 gyda’r Gymdeithas Technegwyr Cyfrifyddu (AAT) ac mae’n aelod o’r Gymdeithas honno ers mis Medi 2018. Ar hyn o bryd, mae’n astudio i fod yn aelod o Gymdeithas y Cyfrifwyr Ardystiedig Siartredig (ACCA).
Mae gan Gweno radd mewn Cyllid a Chyfrifyddu ac mae wedi gweithio ym maes cyllid ers dros 30 mlynedd. Yn ogystal â chymwysterau Sage a Sage Payroll, mae ganddi dystysgrif TAR a bu’n dysgu Sage, Sgiliau Allweddol ac AAT yng Ngholeg Menai am 6 blynedd. Fel rhan o’i dyletswyddau yn Cymen, mae’n cydweithio’n agos â’r Rheolwr Cyllid i godi anfonebau a rheoli credyd, yn ogystal â delio ag ymholiadau ariannol.
Ymunodd Tomos â'r adran gyllid ar ôl iddo gwblhau gradd mewn Mathemateg ym Mhrifysgol Manceinion. Mae ei ddyletswyddau yn cynnwys codi anfonebau a delio â negeseuon e-bost sy’n cael eu cyfeirio at yr adran gyllid. Dyma rôl gyntaf Tomos ym maes cyllid ac mae'n edrych ymlaen at ddysgu gan ei gydweithwyr profiadol ar drothwy ei yrfa.
Myfyr sy’n gyfrifol am gynnal a chadw systemau cyfieithu Cymen, gan gynnwys ein cofion cyfieithu, ein rhestrau termau a’n gwasanaeth cyfieithu peirianyddol. Datblygwyd ein peiriant cyfieithu yn ystod prosiect KTP ar y cyd â Phrifysgol Bangor ac fe ddyfarnwyd gradd A (rhagorol) prin i’r prosiect gan lywodraeth y DU. Dilynwyd hyn gan brosiect SMART pellach rhwng y partneriaid a arweiniodd at uwchraddio ein system i ddefnyddio dulliau cyfieithu peirianyddol niwral (NMT) arloesol.
Mae Myfyr hefyd yn hyfforddi cyfieithwyr a gweinyddwyr i ddefnyddio’r meddalwedd cyfieithu Trados Studio ac yn gwneud gwaith ymchwil parhaus i wella ein systemau. Yn ddiweddar mae wedi bod yn gweithio ar ddatblygu ap i ddefnyddio Cysill yn Trados ac ar drosi rhestrau termau o wahanol fformatau i’w defnyddio yn y rhaglen.
Mae gan Sasha radd mewn Astudiaethau Seisnig ac Americanaidd o Brifysgol Graz yn Awstria, ac maen nhw ar hyn o bryd yn eu hail flwyddyn yn astudio Technolegau Iaith yn rhan-amser ym Mhrifysgol Bangor. Ymunodd Sasha â'r cwmni ym mis Ionawr 2024 i weithio ar brosiect efo Prifysgol Bangor i wella'r systemau adnabod lleferydd Cymraeg. Maen nhw'n dod o Awstria'n wreiddiol ac yn siarad Almaeneg, Saesneg a Chymraeg.
Mae Menna’n gyfieithydd profiadol ac mae hi’n mwynhau gwirio ansawdd gwaith, hyfforddi cyfieithwyr newydd, llunio canllawiau a chanfod ffyrdd o wella prosesau. Mae ganddi radd mewn Cymraeg a Ffrangeg a doethuriaeth ar hanes cyfieithu o ieithoedd Ewropeaidd i’r Gymraeg. Bu’n Eiriadurwraig Cymraeg/Ffrangeg yn CAA, Prifysgol Aberystwyth, ac yn Gyfieithydd i Wasanaeth Tân ac Achub Gogledd Cymru a Llywodraeth Cymru. Mae hi’n un o farcwyr arholiadau Cymdeithas Cyfieithwyr Cymru ac mae hi’n tiwtora gweithdai i’r Gymdeithas.
Mae Elin yn gyfieithydd medrus sydd wedi bod yn gweithio yn Cymen ers dros 10 mlynedd. Mae ganddi radd mewn Cymraeg Proffesiynol ac MA mewn Iaith a Llenyddiaeth Gymraeg, ac mae’n aelod cyflawn o Gymdeithas Cyfieithwyr Cymru. Yn Cymen, mae hi wedi bod yn rheolwr prosiect ar amrywiol gontractau ar gyfer cwmnïau rhyngwladol lle mae wedi bod yn ofynnol iddi lunio arddulliaduron a rhestrau termau cynhwysfawr. Hi yw rheolwr cyfieithwyr allanol y cwmni ac mae’n gyfrifol am sicrhau ansawdd cyfieithiadau, yn ogystal â delio ag ymholiadau ieithyddol gan gyfieithwyr a chleientiaid, a darparu cymorth ac arweiniad trylwyr.
Mae gan Alaw radd mewn Cymraeg a Newyddiaduraeth o Brifysgol Bangor. Ymunodd â thîm Cymen ym mis Gorffennaf 2019 ac mae’n cyfieithu amrywiaeth o ddogfennau, a hynny gan ddefnyddio gwahanol raglenni a meddalwedd cyfieithu. Mae’n mwynhau cyfieithu deunydd ar gyfer y cyfryngau cymdeithasol a’r wasg.
Cyn dod i Cymen, roedd Bethan yn gweithio yn uned gyfieithu Cyngor Gwynedd. Mae ei chefndir ym maes Awdurdod Lleol yn golygu bod ganddi ddealltwriaeth ddofn o’r sector cyhoeddus ac mae’n gyfarwydd iawn â’r derminoleg. Mae hi hefyd yn cyfieithu ar y pryd yn y llysoedd.
Ymunodd Debbie â Cymen yn 2021. Mae ei chefndir ym maes addysg, a bu’n athrawes gynradd am dros 20 mlynedd. Mae ganddi radd mewn Iaith a Llenyddiaeth Gymraeg ac MA mewn Astudiaethau Cyfieithu Proffesiynol o Brifysgol Aberystwyth. Mae hi’n mwynhau cyfieithu creadigol a chyflawni gwaith amrywiol gydag amserlenni tynn.
Ymunodd Delyth â chwmni Cymen ym mis Mehefin 2019 ar ôl gweithio am 13 mlynedd fel athrawes Saesneg. Graddiodd mewn Cymraeg Iaith a Llenyddiaeth o Brifysgol Bangor ac felly mae ganddi afael dda ar y ddwy iaith. Yn ogystal â chyfieithu gwaith amrywiol mewn sawl maes, mae’n arbenigo mewn deunyddiau addysgol ac yn mwynhau bod yn greadigol wrth gyfieithu pecynnau ac adnoddau i ysgolion.
Ymunodd Guto â Cymen yn 2014 yn fuan ar ôl graddio mewn Cymraeg ac Addysg Gorfforol o Brifysgol Bangor. Mae Guto yn ddigon bodlon troi ei law at gyfieithu o’r Saesneg i’r Gymraeg ac o’r Gymraeg i’r Saesneg, ac mae ei aelodaeth o Gymdeithas Cyfieithwyr Cymru yn y ddau faes yn adlewyrchu hynny. Mae ganddo ddiddordeb brwd mewn pêl-droed ac ef oedd yn gyfrifol am gyfieithu clawr y gêm fideo PES Euro 2016 - y gêm fideo gyntaf erioed i gael clawr Cymraeg!
Roedd Gwen yn gyfieithydd gyda Heddlu Gogledd Cymru cyn ymuno â Cymen ac mae ganddi brofiad helaeth o gyfieithu yn y maes cyfiawnder troseddol. Hi sy’n cyfieithu’r rhan fwyaf o’r gwaith ar gyfer Agored Cymru ac mae’n meddu ar sgiliau prawfddarllen craff ar ôl bod yn gweithio ar lawer o ddogfennau a gyhoeddwyd mewn ymgyrch uchel ei phroffil yn y cyfryngau. Mae Gwen yn ymddiddori yn y celfyddydau ac mae’n gallu cymhwyso ei gwybodaeth am y maes hwn yn ei gwaith o ddydd i ddydd.
Ymunodd â Cymen yn 2004 ar ôl bod yn gweithio fel cyfieithydd yng Nghyngor Sir Gwynedd am dros 15 mlynedd. Hilma enillodd y Gadair yn Eisteddfod Genedlaethol 2008 ac felly mae’n hynod fedrus wrth ddarparu cyfieithiadau creadigol ac ysgrifennu sloganau. Mae ganddi hefyd ddiddordeb brwd mewn hanes ac astudiodd ar gyfer MA mewn Eifftoleg. Yn ogystal â hynny, mae hi’n cyfieithu ar y pryd ac yn eistedd fel Ynad yn y Llys, felly mae’r termau cyfreithiol ar flaen ei bysedd.
Ymunodd Huw â chwmni Cymen yn 2015 ar ôl dros ddeng mlynedd yn cyfieithu ar Ynys Môn - yn gyntaf ar brosiect ateb ceisiadau cyfieithu byrion ar amrantiad yn enw Bwrdd yr Iaith Gymraeg, ac yn dilyn hynny fel rheolwr cwmni cyfieithu bychan a oedd yn gwasanaethu’r sectorau cyhoeddus, preifat a gwirfoddol yn lleol a chenedlaethol. Cyn hynny, bu’n astudio ar gyfer MTh a doethuriaeth mewn hanes crefydd yn adran Diwinyddiaeth ac Astudiaethau Crefyddol Prifysgol Cymru, Bangor. Mae gan Huw sgiliau prawfddarllen craff y mae’n eu defnyddio i wirio gwaith cyfieithwyr eraill Cymen.
Mae gan Ieuan radd mewn Cymraeg o Brifysgol Bangor. Ymunodd â thîm Cymen ym mis Gorffennaf 2021 yn dilyn cyfnod o brofiad gwaith fel rhan o’i gwrs MA Cyfieithu Proffesiynol ym Mhrifysgol Aberystwyth. Mae’n mwynhau cyfieithu amrywiaeth o ddogfennau, gan fod hynny’n rhoi’r gallu iddo fireinio’i grefft a dysgu sut i addasu ei gyfieithiadau yn unol â gofynion y cwsmeriaid.
Ymunodd Iwan â chwmni Cymen yn 2021 ar ôl cyfieithu am 15 mlynedd i Gyngor Bwrdeistref Sirol Conwy, felly mae’n gyfarwydd iawn â gweithio ar ddeunydd llywodraeth leol. Cyn hynny bu’n gweithio fel cyfieithydd yn y sector preifat. Mae hefyd yn cyfieithu ar y pryd, ac wedi llwyddo yn arholiad cyfieithu ar y pryd Cymdeithas Cyfieithwyr Cymru. Mae ganddo radd MSc(Econ) mewn Gwleidyddiaeth a Chymdeithas Cymru.
Mae Lisa wedi bod yn gyfieithydd proffesiynol yn y sector preifat ers dros 10 mlynedd. Mae ganddi ddiddordeb ym maes addysg a hyfforddiant yn bennaf ac mae hi wedi datblygu rhestrau termau cynhwysfawr. Mae ganddi brofiad o drawsgrifio deunydd Cymraeg a Saesneg ac mae hi hefyd yn rhan o’r tîm sy’n cyflawni gwaith brys gydag amserlenni tynn.
Enillodd Lois ysgoloriaeth Cymen i astudio MA mewn Astudiaethau Cyfieithu Proffesiynol ym Mhrifysgol Aberystwyth yn 2017 ar ôl graddio mewn Cymraeg Proffesiynol. Ymunodd â Cymen yn 2019 ar ôl iddi gwblhau ei gradd MA, ac mae hi’n gyfrifol am gyfieithu gwaith amrywiol gan gynnwys cyfieithiadau brys gydag amserlenni tynn.
Mae Lois yn gyfieithydd proffesiynol ers 2006. Mae ganddi brofiad helaeth o gyfieithu deunydd cyfrifiadurol ac mae wedi bod yn gyfrifol am gyflawni prosiectau ar gyfer cwmnïau mawr, fel Microsoft. Felly mae’n gyfarwydd iawn â gwahanol feddalwedd ac adnoddau CAT. Mae hi hefyd wedi bod yn rheoli gwahanol brosiectau mewn amrywiol feysydd. Mae ganddi Ddiploma Ôl-radd mewn Cyfieithu gan Brifysgol Cymru.
Mae gan Nia radd yn y Gymraeg yn ogystal ag MA mewn Astudiaethau Cymreig a Cheltaidd o Brifysgol Caerdydd. Ar ôl treulio 7 mlynedd yn gweithio i CBAC yng Nghaerdydd, mae Nia wedi dychwelyd i’r Gogledd ac fe ymunodd â chwmni Cymen ym mis Awst 2023. Mae hi’n cyfieithu amrywiaeth o ddogfennau ac yn mwynhau cyfieithu darnau creadigol yn bennaf.
Ymunodd Owain â chwmni Cymen ym mis Tachwedd 2022. Enillodd ysgoloriaeth Cymen i astudio MA mewn Astudiaethau Cyfieithu Proffesiynol ym Mhrifysgol Aberystwyth yn 2021 ar ôl graddio mewn Cymraeg Proffesiynol. Un o'i brif ddyletswyddau yw cwblhau cyfieithiadau brys gydag amserlenni tynn. Mae'n mwynhau cyfieithu amrywiaeth o ddogfennau, fel posteri a deunydd ar gyfer y cyfryngau cymdeithasol.
Ymunodd Sharon â chwmni Cymen yn 2018 ar ôl dros 15 mlynedd yn cyfieithu i Awdurdod Parc Cenedlaethol Eryri ym Mhenrhyndeudraeth, felly mae’n gyfarwydd iawn â gweithio ar ddeunydd llywodraeth leol. Cyn hynny, bu’n gweithio fel darllenydd proflenni gyda chwmni’r Daily Post & Echo yn Lerpwl. Mae ganddi MA mewn Cymraeg o Brifysgol Bangor ynghyd â Thystysgrif Ôl-raddedig mewn Cyfieithu.
Ymunodd Siôn â chwmni Cymen ym mis Ionawr 2018 ar ôl bod yn gweithio mewn canolfan dreftadaeth ers gadael y Brifysgol. Mae ganddo MA mewn Llenyddiaeth Gymraeg, a oedd yn cynnwys llawer o waith golygu barddoniaeth. Mae’n cyfieithu gwaith amrywiol ym maes twristiaeth a hamdden, yn ogystal â llawer o waith cyfrifiadurol.
Bu Tegwen yn athrawes Gymraeg, yn swyddog datblygu ieuenctid gyda’r Urdd, ac yn gyfieithydd mewn ysgol uwchradd cyn ymuno â Cymen yn 2002. O ganlyniad, mae’n gyfarwydd iawn â gweithio ar ddeunydd addysgol a thestunau sy’n ymwneud ag ymgysylltiad y gymuned. Mae Tegwen wedi meithrin arbenigedd yn y sector meddygol a gofal, gan gyfieithu a phrawfddarllen dogfennau, posteri, tystysgrifau a ffurflenni swyddogol ar gyfer sefydliadau yn y maes hwn
Mae Tegwen yn gyfieithydd profiadol iawn sydd wedi gweithio ym maes llywodraeth leol ac ar ei liwt ei hun. Mae’n aelod o dîm Cymen ers 2018. Mae’n un o farcwyr arholiadau Cymdeithas Cyfieithwyr Cymru. Mae hi hefyd yn cyfieithu ar y pryd, ac wedi cymhwyso i gyfieithu ar y pryd yn yr Undeb Ewropeaidd.
Mae Cymen yn gweithio i safonau rheoli ansawdd rhyngwladol. Sylweddolwn mai cywirdeb o ran iaith a chynnwys yw prif hanfod cyfieithu, a dyma sy'n ein gwneud yn dîm cyfieithu mor uchel ein parch. Mae hyn yn profi bod gan Cymen systemau a gweithdrefnau ansawdd ysgrifenedig sy’n bodloni safonau a disgwyliadau byd-eang.
|
Mae gan Cymen system rheolaeth amgylcheddol ar waith ac rydyn ni’n gwneud pob ymdrech i fod yn gwmni gwyrdd ac i leihau ein hôl troed carbon. Darllenwch ein polisi. |
|
|
Yn Cymen rydyn ni’n cymryd eich preifatrwydd o ddifri a byddwn ond yn defnyddio eich gwybodaeth bersonol i weinyddu eich cyfrif a darparu’r cynnyrch a’r gwasanaethau rydych chi wedi gofyn amdanynt gennym. Ni fyddwn yn rhannu eich gwybodaeth â neb arall.
Dim ond swyddogion sydd ag awdurdod sy’n gallu cael gafael ar yr wybodaeth a bydd yn cael ei chadw’n ddiogel mewn amgylchedd sy’n cael ei warchod gan gyfrinair. Byddwn yn cadw rhywfaint o’ch gwybodaeth ar ffeiliau papur ac mae’r rhain yn cael eu cadw mewn offer swyddfa diogel a dim ond swyddogion sydd ag awdurdod sy’n gallu cael gafael arnynt.
Mae’n rhaid i ni gadw rhywfaint o’ch gwybodaeth am gyfnodau hir er mwyn cydymffurfio â’r gyfraith. Ni fyddwn yn cadw gwybodaeth am ddim mwy nag sy’n angenrheidiol er mwyn diwallu’r dibenion dros ei chasglu.
cymen@cymen.co.uk01286 674409@Cymen_cyfieithu |
Cymen
Pen Deitsh Caernarfon Gwynedd LL55 2AY |
